بالنسبة لموضوع الجريدة الفرنسية .. والاساءة للرسول عليه الصلاة والسلام

• بالنسبة لموضوع الجريدة الفرنسية .. والاساءة للرسول عليه الصلاة والسلام

فكروا معايا كده .. هو ضرر الاساءة ده بيعود على مين ؟
السخرية والاستهزاء مش حاجة جديدة .. بتحصل من بداية دعوة الرسول الناس للاسلام .. الاف سخروا وشتموا .. ويمكن ملايين كمان ! تعرف عنهم ايه ؟ ولا نعرف عنهم حاجة سيرتهم انقطعت فى الدنيا والاسلام انتشر وهينتشر رضوا او لم يرضوا وكل اللى خدوه من سخريتهم من الرسول سيئات فى ميزانهم يوم القيامة .. واللى نعرفه من اللى كانوا بيسخروا لما بيُذكر اسمه بيُذكر فى خانة ( مزبلة التاريخ ) وخسر دنيا واخره !

والرسول ربنا رفع ذكره سواء فى الاذان او فى الاقامة او فى التشهد ! شوف فى كام مسلم بيصلى عليه يوميا ! .. وشوف كام مسلم الرسول احب عنده من نفسه ! ده غير ان كل اذى جسدى او استهزاء اتعرضله واى استهزاء بالرسول بيحصل او هيحصل كل دى حسنات فى ميزان الرسول ومن اسباب بعثه المقام المحمود اللى ربنا وعده بيه !
مش معنى كلامى انك متضايقش بسبب الاساءة للرسول .. لا
انت لو مضايقتش اعرف ان ايمانك فيه حاجة غلط
طبيعى انك تضايق .. والرسول نفسه كان بيضايق من الاساءة ( طبيعة بشرية والرسول فى الاخر بشر ) بس صبر على الاذى وبلغ رسالة ربنا !
لكن معنى كلامى ببساطة .. هونوا على انفسكم !
الاسلام .. انتشر وبينتشر وهينتشر ليوم الدين سواء رضيوا اللى بيسخروا من الاسبلام او الرسول او لم يرضوا !
{ يريدون ليطفئوا نور الله بأفواههم والله متم نوره ولو كره الكافرون (8) هو الذى أرسل رسوله بالهدى ودين الحق ليظهره على الدين كله ولو كره المشركون(9) }
سورة الصف
الرسول .. الاساءة دى مبتضروش .. بل بالعكس بتعود عليه بالنفع ! سواء بعلو الدرجة او بكونها سبب من اسباب بعثه يوم القيامة المقام المحمود
الشخص اللى بيسخر .. سخريته ضرها بيعود على نفسه سواء دنيا او اخرة .. بعد موته يا اما بينقطع سيرته يا اما بيُذكر فى قائمة شخصيات فى مزبلة التاريخ وفى الحالتين فى الاخرة سخريته هتكون من اسباب خلوده فى المكان اللى يستحقه !
{ ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار (42) }
سورة ابراهيم
اللهم صلى وسلم وبارك على محمد واجزه عن كل اذى تعرض له فى سبيل ابلاغ رسالتك خير الجزاء يا الله ..
صلوا عليه !